قصة شاب مصري مات اربع مرات والمرة الخامسة مات في حادث قطار محطة مصر
قصة شاب مصري مات اربع مرات والمرة الخامسة مات في حادث قطار محطة مصر، بعد الحادث المؤلم في محظة مصر، ذهب من يخبر والدة أحدهم بوفاة ولدها ..
- ازيك يا حاجة ؟
= الحمد لله يابنى
- انا جاي عشان ابلغك خبر مش حلو
= عارفاه وحساه والباب بيخبط
- هو اية يا حاجة ؟
= ابنى مات صح ؟
- ايوة يا حاجة .. ربنا يديكى الصحة والبقية فى حياتك
= تعالى ادخل اما اعملك شاى
- شاى اية يا حاجة ! بقولك ابنك مات
= عارفة يابنى .. ابنى ميت من زمان .. بس قولى هو مات ازاى المرادى ؟
- مات المرادى !! كان واقف فى محطة القطر يا حاجة مستنى القطر بتاعة .. فية قطر جه تقريبا مكنش فيه فرامل خبط فى الرصيف ولع, وولع فى كل اللى حوالية .. للاسف ابنك حتى مش لاقيين منه غير تراب
= سكرك اية يابنى ؟
- هو فى اية يا حاجة بس !! وبعدين اية ميت من زمان دى انا مش فاهم ؟ واية الصبر اللى عندك والهدوء دة ؟
= يابنى .. محدش بيهرب من قدرة .. انا عارفة ان ابنى هيموت .. بس اهو كنت بحاول اخلية جنبى اطول فترة .. ابنى ميت من زمان لما اتخرج من كلية الهندسة وملقاش شغل .. ومات مرة تانيه لما حب واحدة وكان نفسة يتجوزها ومكنش لاقى يجيب شقة يتلم فيها هو هى .. ومات مرة لما اشتغل سواق ميكروباص وهو خريج هندسة .. ومات كمان مرة لما ابوه مات وشال همى وهم مرضى وهو مكنش لاقى حتى يجيب فطاره ..ومات مرة لما ..
- كفاية يا حاجة ..
= انت عارف يابنى ..ابنى وهو نازل النهاردة كنت حسة انه هيموت للمرة الخامسة ..كان مسافر البلد عشان يشوف شغل هناك عشان يعرف ناس كتير فى بلدنا ..قاللى هاخد الموتوسيكل .. قولتله يابنى بلاش الموتوسيكل دة .. حوادثة وحشة وبتموت .. قاللى خلاص هركب ميكروباص .. قولتله بلاش يابنى .. طريق البلد كله مصارف وميه وتراب والعربيات بتتقلب عليه كتير .. قاللى اروح مشى ؟ قولتله لا خد القطر اهو سهل وامان ومفيهوش بهدله ...
- والله مش عارف اقولك ايه يا حاجة .. عموما متزعليش الحكومه هتصرفلك 80 الف جنيه عشان تقدرى تعيشى بيهم بعد ابنك
= خليهم للحكومة يابنى مش عايزاهم .. اقولك خليهم يشتروا فرامل جديدة للقطر وقولهم ام محمد بتقولكم اشتروا فرامل .. يمكن يابنى محدش تانى يموت
